Já Rúnar Páll býst ekki við sambabolta í kvöld, leikirnir á þessum velli vilja oft snúast meira um baráttuna en einhverja fagurfræði. Líklegt að það verði upp á teningnum í kvöld. Það mun reyna eitthvað á dómaratríóið.

Liðin eru að búa sig undir að ganga út á völlinn.

Hér má sjá brot af því sem þjálfararnir sögðu í viðtali við Tómas Þór á Stöð 2 fyrir leikinn.

Logi Ólafs, Víkingur: Þetta er stór leikur. Við einbeitum á það að standa okkur vel, svo kemur bara í ljós hvað það færir okkur. Það er ákveðinn möguleiki og vonandi grípum við það tækifæri. Tapið gegn Val var mikil vonbrigðaframmistaða.

Rúnar Páll, Stjarnan: Ég hugsa þennan leik þannig að við ætlum að fá þrjú stig. Síðustu dagar hafa snúist um endurheimt eftir Evrópuleikinn og við verðum að fá tempóið í okkar leik. Þegar þessi lið mætast eru leikirnir rosalegir og mikið jafnræði. Ég held að þetta verði bara slagsmál út í leik, harka og djöfulgangur. Völlurinn býður líka upp á það.

Ákveðin vonbrigði að hinn hefðbundni vallarþulur á Heimavelli hamingjunnar er ekki á vaktinni í kvöld. Væntanlega í sumarfríi. Mikill söknuður og rýrir möguleika hans á að vera valinn vallarþulur ársins í útvarpsþættinum Fótbolti.net.

Varavallarþulurinn með íslenskt þema. Helgi Björns og Bubbi Morthens fá stefgjöld.

Eitt sem ég veit er að lesendur hafa ákaflega mikinn áhuga á veitingum í fréttamannastúkum. Veitingasending Víkinga var að mæta og hún samanstendur af: einni sjóðheitri frá Shake & Pizza, kleinum og kökum, þremur dósum af kók og tveimur kaffikönnum.

Við erum sem stendur aðeins tveir í fréttamannastúkunni svo það stefnir í álag á okkur. Við gerum okkar besta.

Liðin að hefja upphitanir sínar fyrir leikinn. Það er þrettán gráðu hiti, úði og mjög hægur vindur. Flott fótboltaveður. Eini leikur kvöldsins í deildinni og ég geri KRÖFU á góða mætingu!

Stjarnan tapaði 0-2 fyrir FCK í forkeppni Evrópudeildarinnar í liðinni viku. Frá þeim leik kemur Brynjar Gauti Guðjónsson inn í byrjunarliðið fyrir Óttar Bjarna Guðmundsson. Þórarinn Ingi Valdimarsson fer á bekkinn með Óttari en Alex Þór Hauksson kemur inn.

Byrjunarliðin eru komin inn.

Sóknarmaðurinn Geoffrey Castillion fer beint í byrjunarlið Víkinga en hann er kominn á lánssamningi frá FH. Castillion var öflugur við markaskorun fyrir Víkinga á síðasta tímabili. Miðvörðurinn Sölvi Geir Ottesen meiddist í tapleiknum gegn Val og er ekki í hóp. Stórt skarð sem hann skilur eftir sig hjá Víkingum.

Donni er spámaður umferðarinnar. Hann spáir 0-2:
Hef alltaf verið mikill Víkingur og það eru flottir leikmenn þar. En Stjarnan hefur heillað mig mjög mikið í sumar og mun klárlega berjast um dolluna. Þessi leikur fer 0-2 fyrir Stjörnunni, Hilmar Árni skorar úr víti og Guðjón Baldvins setur seiglumark í lokin.

Guðjón Baldvinsson, framherji Stjörnunnar:
Þetta er í fyrsta skipti í langan tíma sem við höfum ekki náð að skora í þremur leikjum í röð. Við þurfum aðeins að fókusera að ná okkar leik upp og þetta er mikilvægur leikur fyrir okkur að halda áfram í toppbaráttunni. Það er allt í góðu í leikmannahópnum. Það er ekkert óeðlilegt að upp komi smá þreyta og meiðsli í svona miklu álagi en við erum allir ákveðnir að halda þessu áfram og ætlum ekkert að gefa eftir. Víkingsliðið hefur sýnt það að það hefur spilað mjög vel og það er sérstaklega erfitt að brjóta þá niður á heimavelli. Við þurfum að eiga okkar besta leik.

Vonandi svipað fjör og síðast!
Þegar liðin mættust í þriðju umferð deildarinnar enduðu leikar 3-3 í Garðabænum! Rikki Té, Rick Ten Voorde, skoraði tvö mörk í þeim leik. Þar á meðal jöfnunarmark í uppbótartíma. Arnþór Ingi skoraði hitt mark Víkinga en mörk Stjörnunnar skoruðu Hilmar Árni (2) og Þórarinn Ingi.

Víkingar eru í áttunda sæti. Það eru sjö stig niður í fallsæti og Fossvogsliðið því í fínustu málum. Fyrir tapleikinn gegn Val í síðustu umferð hafði liðið unnið þrjá leiki í röð. Skrambi gott það!

KR batt enda á sigurgöngu Stjörnunnar í síðustu umferð með 1-0 sigri. Stjörnumenn þurfa betri frammistöðu í kvöld en þeir sýndu fyrir viku síðan. Garðabæjarliðið er í öðru sæti með 25 stig, þremur stigum á eftir Valsmönnum.

Castillion mættur!
Hollenski framherjinn Geoffrey Castillion mun spila með Víking R. út tímabilið á láni frá FH. Þetta kom fram í tilkynningu frá Víkingum í gær.

Castillion, sem er 27 ára, þekkir vel til hjá Víking en hann kom til félagsins fyrir síðasta tímabil og gerði þá 11 mörk í 16 leikjum í Pepsi-deildinni. Eftir tímabilið samdi hann við FH en honum hefur alls ekki tekist að finna sig í sumar og aðeins skoraði eitt mark í tíu leikjum í deildinni.

Fróðlegt að sjá hvort Castillion byrji í kvöld. Og svo er líka spurning með Sölva Ottesen sem fór meiddur af velli í tapinu gegn Val í síðustu umferð. Byrjunarliðin verða opinberuð 60 mínútum fyrir leik.

Heil og sæl! Velkomin með mér á Heimavöll hamingjunnar í Fossvoginum. Víkingur leikur gegn Stjörnunni æi 14. umferð Pepsi-deildarinn klukkan 19:15 en dómari kvöldsins er Vilhjálmur Alvar Þórarinsson.