Jæja það er korter í stórleikinn. Liðin eru að hita upp og áhorfendur eru hægt og rólega farnir að koma sér fyrir í stúkunni.
Hvet alla sem hafa tök á að drífa sig á völlinn og reynum að búa til alvöru stemningu!

Byrjunarliðin eru komin inn og má sjá þau hér til hliðanna

Valur gerir eina breytingu frá síðasta deildarleik en Dóra María kemur inn í stað Mistar Edvardsdóttur. Breiðablik gerir að sama skapi eina breytingu en Berglind Björg kemur inn í liðið á ný á kostnað Karólínu Leu.

Skoðum nú aðeins hvernig síðustu leikir liðanna hafa farið:

2019
3-1 fyrir Val í riðlakeppni Lengjubikar
1-3 fyrir Blikum í úrslitum Lengjubikars

2018
Breiðablik 1 - Valur 0
Valur 3 - Breiðablik 2

2017
Breiðablik 3 - Valur 0
Valur 2 - Breiðablik 0

2016
Breiðablik 1 - Valur 1
Valur 1 - Breiðablik 0

2015
Breiðablik 6 - Valur 0
Valur 0 - Breiðablik 6

Valur teflir fram gríðarlega reyndu liði á þessu keppnistímabili. Meðalaldur byrjunarliðsins í fyrstu 7 leikjunum er rétt rúmlega 27 ár á meðan meðalaldur Blikastúlkna er rétt rúmlega 22 ár. Aldur er svo sem afstæður eins og bæði KR í karlaflokki og Valur í kvennaflokki eru að sýna okkur þessa dagana en bæði sitja í toppsætum Pepsi Max-deildanna.

13 leikmenn Vals hafa leikið A-landsleiki (þ.á.m. Vesna Elísa Smiljkovic 77 leiki fyrir Slóvakíu) og alls 680 leiki á meðan 9 Blikastúlkur hafa leikið 108 A-landsleiki.

Í þessum leik mætast sigursælustu lið Íslandsmótsins frá upphafi. Breiðablik hefur oftast allra liða orðið Íslandsmeistari eða 17 sinnum (síðast 2018) og Valur hefur 10 sinnum hampað titlinum (síðast 2010).

Þessi tvö lið hafa leikið flesta leiki frá því Íslandsmótið hófst árið 1972 og Breiðablik er með níu leikjum meira en Valur. Breiðablik lék sinn 600. leik í efstu deild þegar liðið vann 2:1-sigur á HK/Víkingi í 7. umferðinni og varð fyrsta félagið sem nær þeim áfanga.

Í síðustu umferð í deildinni sem spiluð var 23. og 24. júní sigraði Valur á útivellli gegn ÍBV með 3 mörkum gegn 1 og Blikar unnu HK/Víking á heimavelli 2:1 með sigurmarki í uppbótartíma.

Valsstelpur áttu svo leik á laugardaginn í Mjólkurbikarnum þar sem þær lutu í lægra haldi gegn Þór/KA. Þetta þýðir að tvö langefstu liðin í Pepsi Max-deildinni eru nú dottin út úr bikarkeppninni í ár sem gerir þennan fyrri úrslitaleik deildarinnar bara ennþá meira spennandi.

Bæði lið hafa verið í algjörum sérflokki í sumar og hafa unnið alla sína leiki í deildinni og eru því með 21 stig eftir 7 umferðir. Þetta eru einnig liðin sem hafa skorað mest og fengið fæst mörk á sig.

Markatala liðanna í deildinni:
Valur - 26:4
Breiðablik - 20:5

Góða kvöldið kæru lesendur og verið hjartanlega velkomin í þessa beinu textalýsingu frá stórleik Vals og Breiðabliks í Pepsi Max-deild kvenna.

Leikurinn hefst klukkan 19:15 á Origo-vellinum.