Það eru tveir leikmenn sem valdir voru í úrvalslið umferðar 1-11 að fara að spila þennan leik í kvöld: Hilmar Árni Halldórsson og Josip Zeba.

Maður má ekki vera leiðinlegur... en ég er ekkert of bjartsýnn á skemmtilegan leik í kvöld. Vona samt rosalega að mér skjátlist.

Áhugavert að Twitter síða Stjörnunnar hendir liðinu upp í 4-4-2 með Hilmar Árna í sóknarlínunni... bíðum og sjáum...

Hjá Grindavík er ein breyting frá síðasta leik. Marinó Axel Helgason er ekki í hópnum vegna meiðsla og Sigurjón Rúnarsson kemur inn.

Byrjunarliðin eru komin inn.

Tvær breytingar hjá Stjörnunni frá síðasta leik. Ævar Ingi Jóhannesson og Martin Rauschenberg fara á bekkinn en Eyjólfur Héðinsson og Guðmundur Steinn Hafsteinsson koma inn.

Vegna fjölda fyrirspurna: Er Páló mættur í stúkuna? Já hann er mættur! Hann er þessa stundina að leggja línurnar fyrir dómara leiksins.

Lárus Guðmundsson er spámaður umferðarinnar:
Stjarnan fer með 2-0 sigur af hólmi. Eru erfiðir heim að sækja og með vel skipulagt lið og Hilmar Árni er með mark nánast í hverjum leik þessa dagana. Grindvíkingum dugar ekki sterkur varnarleikur, því sóknarleikurinn hjá þeim er alveg bitlaus.

"Sumarið er tíminn" er fyrsta lagið sem komið er í hljóðkerfið. Voða huggulegt enda veðrið fyrsta flokks... nema reyndar í stúkunni sem er ein umtalaðasta frystikista landsins. En það er önnur umræða.

Dómararnir eru búnir að skoða völlinn og fundu ekkert neikvætt. Þorvaldur Árnason dæmir leikinn í kvöld en aðstoðardómarar eru kjötiðnaðarmaðurinn frá Hvolsvelli, Jóhann Gunnar Guðmundsson og svo Andri Vigfússon.

Þegar liðin áttust við í Grindavík í upphafi móts enduðu leikar 1-1. Bæði mörkin komu af vítapunktinum. Guðmundur Steinn kom Stjörnunni yfir. Kiyabu Nkoyi sem yfirgaf Grindavík á dögunum jafnaði.

Heimamenn vonast til að vinna sinn þriðja leik í röð. Þeir unnu ÍBV í Vestmannaeyjum í síðustu umferð þar sem Hilmar Árni Halldórsson og Guðmundur Steinn Hafsteinsson skoruðu mörkin.

Það er talsvert síðan Grindavík vann leik en liðið gerði markalaust jafntefli gegn FH í síðustu umferð. Sóknarleikur Grindvíkinga hefur verið geldur í sumar en vörnin eins og veggur! Liðið er búið að skora fæst mörk í deildinni en að sama skapi fá á sig fæst mörk. Markatalan 7-9.

Gott og gleðilegt kvöld!

Annar leikur hinnar ótrúlega dreifðu 12. umferðar Pepsi Max deildarinnar fer fram í Garðabænum. Stjarnan, sem er sem stendur í þriðja sæti, tekur á móti Grindavík sem er í 10. sæti með ellefu stig.