Fer að styttast í leik hér. Eina spurningin er fer bikarinn á loft hér í Keflavík í höndum Fjölnis eða á Nesinu í hendur Gróttu.

Fyrri viðureignir

Liðin hafa mæst 14 sinnum alls í mótum á vegum KSÍ.

Keflavík hefur haft sigur 4 sinnum, Fjölnir hefur sömuleiðis unnið 4 og 7 leikjum hefur lokið með jafntefli.

Markatalan er líka jöfn en hvort lið um sig hefur skorað 22 mörk.

Fyrri leik liðanna í sumar lauk með 1-1 jafntefli þar sem Albert Brynjar Ingason kom Fjölni yfir á 34. mínútu og stefndi allt í sigur Fjölnis þegar Rúnar Þór Sigurgeirsson jafnaði fyrir Keflavík á 94. mínútu.

Keflavík spilar uppá stoltið í dag en þeir sitja um miðja deild og geta hæst lent í 4.sæti verði önnur úrslit þeim hliðholl.

Sumarið byrjaði vel fyrir lærisveina Eysteins Húna og Milans en Keflavík var á toppnum eftir 6 umferðir. Þá tók við hræðilegur kafli hjá liðinu og sérstaklega þá á heimavelli sem gerði út um vonir Keflavíkur á að fara upp.

Óstöðugleiki hefur verið lykilorð í frammistöðu Keflavíkur í sumar en á góðum degi eru þeir eitt besta lið deildarinar en hafa að sama skapi átt hörmulega leiki sem varla sæma Inkasso liði.

En það er uppbygging í gangi á Nettóvellinum og ungir leikmenn liðsins hafa öðlast dýrmæta reynslu í sumar og koma eflaust tvíelfdir til leiks að ári.

Fjölnisliðið er búið að tryggja sér sæti á meðal þeirra bestu í Pepsi Max deildinni eftir árs fjarveru. Spilamennska þeirra í sumar verðskuldar það svo sannarlega en liðið settist á toppinn eftir 9.umferð og hefur ekki litið um öxl síðan.

Það er þó ekki svo að Fjölnir hafi ekki að neinu að keppa í dag því deildartitillinn er enn í boði og eru Fjölnismenn þar í kjörstöðu. Jafntefli ætti að duga þeim til þess að fá bikar í leikslok nema Grótta taki upp á því að vinna 19 marka sigur sem verður að teljast ólíklegt. Tapi Fjölnir hins vegar fer bikarinn vestur á nes vinni Grótta Hauka.

Heil og sæl kæru lesendur og verið velkomin í beina textalýsingu Fótbolta.net frá leik Keflavíkur og Fjölnis í lokaumferð Inkasso deildarinnar.