Liðin ganga út á völlinn. Roooosalega fámennt í stúkunni. Einn sem situr KA megin, það er markvörðurinn Kristijan Jajalo sem er á meiðslalistanum. Jæja meðan ég skrifa þetta mæta nokkrir úr Silfurskeiðinni með trommur og góða skapið í vökvaformi.

Ungstirni, við elskum ungstirni.

Eggert Aron Guðmundsson er yngsti leikmaður vallarins, Stjörnustrákur fæddur 2004. Strákur sem hefur komið við sögu í fimm leikjum í Pepsi Max-deildinni í sumar. Spennandi að sjá þennan sautján ára leikmann í byrjunarliðinu.

Sólin skín alls staðar í Garðabænum, nema í stúkunni auðvitað. Garðbæingar búnir að setja upp net fyrir Schiöttarana, stuðningsmenn KA. Verða lokaðir inni í búri í þessum leik.

Ejub Purisevic að stýra upphitun Stjörnumanna af sinni alkunnu snilld. Allir í stuði. Páló að sjálfsögðu fyrstur í stúkuna og er búinn að fá sér vængi.

Byrjunarliðin eru komin inn.

Þorvaldur Örlygsson gerir þrjár breytingar á sínu byrjunarliði. Eggert Aron Guðmundsson, Tristan Freyr Ingólfsson og Halldór Orri Björnsson koma inn fyrir Þórarin Inga Valdimarsson, Þorstein Má Ragnarsson og Eyjólf Héðinsson.

Arnar Grétarsson gerir fjórar breytingar. Haukur Heiðar Hauksson, Andri Fannar Stefánsson, Steinþór Freyr Þorsteinsson og Bjarni Aðalsteinsson koma inn fyrir Rodrigo Mateo, Daníel Hafsteinsson, Sebastiaan Brebels og Ásgeir Sigurgeirsson.

Einar Karl Ingvarsson, miðjumaður Stjörnunnar, var í viðtali við Fótbolta.net. Hvernig lýst honum á leikinn í kvöld?

"Bara mjög vel, við spiluðum á móti þeim nýlega og töpuðum 1-0. Þar fannst mér við spila ágætan leik, vorum fínir. Ég held að bikarleikir séu aðeins öðruvísi en deildarleikir, maður fer í vissan gír og það vilja allir vera í bikarnum. Við erum helvíti spenntir fyrir leiknum og 100% klárir í að fara áfram í þessari keppni."

Er einhver hefndarhugur í ykkur eftir tapið í deildinni?

"Nei, nei, ekkert sem ég allavega pæli í. Sá leikur fór bara eins og hann fór og við ætlum bara að vinna þennan leik. Það er ekkert flóknara en það," sagði Einar Karl.

Fyrir mánuði síðan...


Fyrir fjórum vikum síðan áttust liðin við í Pepsi Max-deildinni hér á Samsung-vellinum. Þar sló klukkan gleði hjá gestunum en Elfar Árni Aðalsteinsson skoraði eina mark leiksins á 82. mínútu.



Stjarnan byrjaði Pepsi Max-deildina afleitlega en er að rétta úr kútnum, liðið er án ósigurs í fjórum leikjum í röð. KA hefur spilað vel á tímabilinu og er í þriðja sæti.

En þetta er auðvitað bikarleikur og þá skiptir staða í deild litlu máli.

Guð hjálpi þessum liðum ef leikurinn fer í vítaspyrnukeppni...

Þetta er einn af þremur innbyrðis Pepsi Max-leikjum í 32-liða úrslitum bikarsins.

KA kemur inn í þennan leik eftir tapleik gegn Val um síðustu helgi þar sem Akureyrarliðið klúðraði tveimur vítaspyrnum. Stjarnan vann HK á sama tíma 2-1 þar sem Hilmar Árni Halldórsson klúðraði víti.

Það þarf varla að taka fram að í kvöld verður að sjálfsögðu leikið til þrautar. Framlenging... og svo vítaspyrnukeppni ef á þarf að halda.

Heil og sæl!

Verið velkomin með okkur í beina textalýsingu frá leik Stjörnunnar og KA í 32-liða úrslitum Mjólkurbikarsins. Málarameistarinn Erlendur Eiríksson flautar til leiks klukkan 18 en aðstoðardómarar í kvöld eru kjötiðnaðarmaðurinn frá Hvolsvelli, Jóhann Gunnar Guðmundsson, og hinn síkáti Eysteinn Hrafnkelsson.