Byrjunarliðin eru komin inn: Óbreytt lið hjá Kef

Siggi Höskulds, þjálfari Leiknis, gerir tvær breytingar á liði sínu frá leiknum gegn ÍA. Máni Austmann er ekki með og Octavio tekur sér sæti á bekknum. Inn í liðið koma þeir Manga Escobar og Jón Hrafn Barkarson. Jón Hrafn er fæddur árið 2003.

Engar breytingar eru á liði Keflavíkur frá leiknum gegn HK í bikarnum. Tvær breytingar eru á varamannabekknum. Adam Árni og Ingimundur Aron koma inn á bekkinn.

Siggi var allt annað en sáttur

Sigurður Heiðar Höskuldsson, þjálfari Leiknis, var allt annað en sáttur við leik sinna manna gegn ÍA í síðustu umferð. Hann var spurður út í síðustu leikina.

,,Leikmenn þurfa bara að spila upp á það að eiga skilið að vera í Leiknistreyjunni. Við erum ekki búnir að vinna útileik, þessi frammistaða hérna sem átti að keyra okkur inn í þessa þrjá síðustu leiki hún var gjörsamlega fyrir neðan allar hellur. Við þurfum einhvern kraft inn í þessa tvo síðustu leiki. Planið var að keyra á eins mörg stig og við gætum í lokaumferðunum. Við erum ekki sloppnir og við þurfum að klára þetta eins og menn."

Smelltu hér til að hlusta á viðtalið í heild

Keflavík áfram í bikarnum

Keflavík lagði HK að velli í 8-liða úrslitum á miðvikudag. Keflavík mætir ÍA í undanúrslitum keppninnar. Leikurinn á miðvikudag endaði með 3-5 sigri Keflavíkur í Kórnum.

Eysteinn Húni Hauksson, annar af þjálfurum Keflavíkur, var til viðtals eftir þann leik.

Framundan eru tveir mikilvægir leikir í Pepsi Max deildinni. Eftir úrslit kvöldsins er Eysteinn bjartsýnn?

,,Já ég hef alltaf trú á þessum strákum og við sögðum það fyrir leikinn að þrátt fyrir að það hafi gengið illa undanfarið þá missum við aldrei trúna enda sýndu þeir það í dag að það er engin ástæða til þess."

Smelltu hér til að nálgast viðtalið í heild.

Sigurður Ragnar Eyjólfsson, annar af þjálfurum Keflavíkur, var spurður út í síðustu tvo leikina í viðtali eftir leikinn gegn KR. Eru þetta ekki tveir bikarúrslitaleikir til að halda sér uppi?

,,Jú, jú, þeir eru mikilvægir fyrir klúbbinn okkar. Við verðum að þjappa okkur saman og klára þessa tvo leiki, erfiðir leikir báðir," sagði Siggi.

Hann kom í viðtalinu inn á endurkomu Rúnars Þórs og meiðsli leikmanna. Ingimundur meiddist í upphitun fyrir leikinn gegn KR og Frans Elvarsson meiddist í leiknum. Frans var þó mættur aftur í bikarleiknum síðasta miðvikudag.

Smelltu hér til að hlusta á viðtalið í heild.

Staðan í deildinni:

Leiknir er í 8. sæti deildarinanr með 22 stig. Liðið tapaði 3-1 gegn ÍA í síðasta leik.

Keflavík er í 9. sæti með átján stig, tveimur stigum fyrir ofan Fylki sem er í fallsæti.

Á sama tíma fer leikur ÍA og Fylkis fram á Akranesi.

Fyrri leikur þessara liða í sumar endaði með 1-0 sigri Keflavíkur í Keflavík. Joey Gibbs skoraði eina mark leiksins á 6. mínútu.

Jón Þór spáir
Jón Þór Hauksson, þjálfari Vestra og fyrr í sumar sérfræðingur í Pepsi Max-stúkunni, er spámaður umferðarinnar í Pepsi Max.

Jón Þór spáir 2-2 jafntefli í þessum leik.

Það er jafnteflisbragur á þessum leik. Leiknir vill gera betur eftir slakan leik á Skaganum í síðustu umferð. Leiknismenn vilja alls ekki enda gott tímabil með tapi í síðasta heimaleiknum.
Jón Þór

Helgi Mikael Jónasson dæmir leikinn í dag. Honum til aðstoðar eru þeir Þórður Arnar Árnason og Guðmundur Ingi Bjarnason. Vilhjálmur Alvar Þórarinsson er varadómari og Frosti Viðar Gunnarsson er eftirlitsmaður KSÍ.


Helgi Mikael

Góðan og blessaðan daginn lesendur góðir og veriði velkomnir í beina textalýsingu frá leik Leiknis og Keflavíkur í næstsíðustu umferð Pepsi Max-deildarinnar.

Leikurinn hefst klukkan 14:00 og fer fram á Domusnovavellinum í Breiðholti.