Allt að verða til reiðu hér á heimavelli hamingjunnar. Vantar reyndar kaffi í fréttamannastúkuna en Gulli Jóns gengur hreint til verks og ætlar að reyna að redda því.

Ástæðan fyrir því að Kwame Quee er ekki með Víkingum er sú að hann er í landsliðsverkefni með Síerra Leóne. Eiga stórleik gegn Benín á mánudaginn.

Byrjunarlið beggja lið eru komin inn.

Eggert Gunnþór Jónsson og Guðmann Þórisson koma inn í byrjunarlið FH að nýju eftir meiðsli. Ágúst Eðvald Hlynsson er í byrjunarliði Hafnfirðinga gegn sínum fyrrum félögum.

Hjá Víkingum er Kwame Quee ekki með. Kristall Máni Ingason kemur inn í byrjunarliðið.

Víkingar geta komist á toppinn
Á sama tíma og þessi leikur fer fram þá mætast Stjarnan og Valur í Garðabænum. Ef Valsmenn misstíga sig þar og Víkingar fagna sigri þá komast Víkingar á toppinn. Það er ekki flóknara en það!

Víkingar hafa gert jafntefli í síðustu tveimur leikjum sínum, gegn Val í byrjun vikunnar og þar á undan gegn Fylki.



Freyr Alexandersson var gestur í útvarpsþættinum Fótbolti.net á X977 fyrir viku og hrósaði þar Arnari Gunnlaugssyni, þjálfara Víkinga, í hástert.

"Ég er gríðarlega ánægður með þróun Víkinga. Ég dáist að æðruleysi Arnars Gunnlaugssonar og finnst geggjað hvernig hann hefur nálgast verkefnið sitt. Hann er æðisleg manneskja, við vitum allir að hann er klár fótboltaheili en hann hefur komið mér gríðarlega á óvart sem leiðtogi. Hann hefur sýnt mikinn þroska þar, hvernig hann er tilbúinn að henda í burtu því sem við viljum oft kalla 'barnalegt' og fara í það sem skiptir máli til að ná í úrslit," segir Freyr.

Kári Árnason hefur verið einn besti leikmaður mótsins hingað til og Freyr segir að hann sé 'man on a mission', maður í verkefni.

"Hann (Arnar) treystir Kára gríðarlega í að vega og meta hvað þarf að gera inni á vellinum. Mér finnst þetta jafnvægi afskaplega flott. Ég er mjög hrifinn af þessu."

Tómas Þór Þórðarson segir að þegar tölfræðin sé skoðuð sé gríðarleg breyting á spilamennsku Víkinga frá síðasta ári.

"Þetta er einhver mesta umbylting á einu fótboltaliði á sex til sjö mánuðum sem hefur sést hérna, 'possession' hefur farið niður og 100 færri sendingar en stigin miklu fleiri. Þetta er bara breytt fótboltalið," segir Tómas og Freyr bætir við:

"Mér finnst þeir hinsvegar ekki hafa farið framhjá grunn hugmyndafræðinni sinni. Þeir hafa bara aðlagað hana aðeins," segir Freyr og talar um hversu mikið Pablo Punyed, sem kom frá KR, færir liðinu.

"Þessi kaup á Pablo Punyed eru snilldarleg. Hann er algjör stríðsmaður og hann er geggjaður í fótbolta. Svo er hann líka frábær spyrnumaður í föstum leikatriðum og gefur þeim mikið. Ég hef ekki kafað í neinar greiningarskýrslur, þetta er bara út frá auga og tilfinningu. Ég hef séð marga leiki með þeim og þeir hafa heillað mig mjög mikið," segir Freyr.

FH kemur úr tveimur tapleikjum í röð
Það er langt síðan FH-ingar voru síðast í eldlínunni í Pepsi Max-deildinni. Þá töpuðu þeir 2-1 fyrir Leikni í Breiðholtinu 25. maí. Í umferðinni þar á undan tapaði liðið gegn KR.

FH-ingar eru með tíu stig eftir sex leiki og vilja binda endi á taphrinuna í dag.

Spurning hvort einhverjir FH-ingar séu slappir eftir að hafa fengið bóluefni á fimmtudag? Þátttökuliðin í Evrópukeppnum fengu Janssen í vikunni. Textalýsandi fór á sama tíma í bólusetningu og átti frekar slappan föstudag verður að viðurkennast!

Góðan og gleðilegan daginn og velkomin með okkur á heimavöll hamingjunnar þar sem Víkingur og FH eigast við klukkan 17:00.

Einar Ingi Jóhannsson er dómari leiksins. Birkir Sigurðarson og Smári Stefánsson eru aðstoðardómarar og með skiltið er Jóhann Ingi Jónsson.