Ingibjörg Sigurðardóttir spilaði fyrri hálfleikinn í stórsigri Vålerenga gegn Avaldsnes í efstu deild í Noregi.
Vålerenga gerði þrjú mörk í hvorum hálfleik og stóð uppi sem 6-0 sigurvegari. Liðið er með fullt hús stiga eftir sjö umferðir en næsti leikur gæti farið langleiðina með að ráða úrslitum þegar líður á deildartímabilið.
Vålerenga á næst leik við Brann sem er einnig með fullt hús stiga. Svava Rós Guðmundsdóttir er á mála hjá liðinu og kom hún af bekknum í sigri í dag. Berglind Björg Þorvaldsdóttir, sem er einnig í herbúðum Brann, er frá vegna meiðsla.
Brann sigraði Kolbotn og fékk Svava Rós að spila síðasta stundarfjórðunginn í 2-1 sigri.
Þá spilaði Selma Sól Magnúsdóttir í tapi Rosenborg gegn Lyn, 0-1. Hún kom inn á sem varamaður eftir um klukkutíma leik.
Vålerenga 6 - 0 Avaldsnes
Brann 2 - 1 Kolbotn
Rosenborg 0 - 1 Lyn
María Catharina Ólafsdóttir Gros og stöllur í Celtic eru þá komnar í úrslitaleik skoska bikarsins eftir framlengingu gegn Hearts.
Staðan var markalaus eftir venjulegan leiktíma en Charlie Wellings setti tvennu til að tryggja sigur í framlengingu.
Celtic mætir annað hvort Partick Thistle eða Glasgow FC í úrslitaleik.
Hearts 0 - 2 Celtic
0-1 Charlie Wellings ('108)
0-2 Charlie Wellings ('110)