Trent Alexander-Arnold, bakvörður Liverpool, er meðal fjögurra hægri bakvarða sem Gareth Southgate landsliðsþjálfari Englands velur í 26 manna lokahóp sinn fyrir EM alls staðar.

Sögusagnir voru á ferðinni um að Trent yrði ekki valinn en hann er hinsvegar í hópnum. Kieran Trippier, Kyle Walker og Reece James sem einnig eru hægri bakverðir eru líka valdir.

Ollie Watkins, Mason Greenwood, James Ward-Prowse, Jesse Lingard, Aaron Ramsdale, Ben Godfrey og Ben White eru leikmennirnir sem voru í úrtakshópnum en fara ekki með á mótið. Greenwood dró sig út vegna meiðsla.

Jude Bellingham, leikmaður Dortmund sem verður 18 ára síðar í þessum mánuði, er í hópnum.

Harry Maguire, sem missti af úrslitaleik Evrópudeildarinnar vegna ökklameiðsla, er í hópnum. Hann er hinsvegar tæpur fyrir fyrsta leik Englands gegn Króatíu þann 13. júní. Skotland og Tékkland eru einnig í riðlinum.