Breiðablik gerði jafntefli við Osijek frá Króatíu í fyrri leik liðanna í annarri umferð forkeppni Meistaradeildar kvenna.

Selma Sól Magnúsdóttir kom Breiðabliki yfir eftir slæm mistök í vörn Osijek. Hún kláraði færi sitt frábærlega.

Heimakonur voru þó ekki lengi að svara. Þær skoruðu mjög einfalt mark sjö mínútum síðar. Það var Merjema Medic sem jafnaði metin fyrir króatíska liðið.

Breiðablik var sterkari aðilinn í leiknum en það vantaði alltaf upp á annað hvort síðustu sendingu eða síðustu snertingu þegar þær komu sér í hættulega stöðu.

„Þá er þessum fyrri leik liðanna lokið. Jafntefli niðurstaðan. Breiðablik átti bara að vinna þennan fótboltaleik enda mikið betra lið. Þær klára þetta einvígi á Kópavogsvelli og fara í riðlakeppnina; ég er handviss um það," skrifaði undirritaður í beinni textalýsingu frá leiknum.

Seinni leikurinn er í næstu viku. Sigurliðið þar kemst í riðlakeppni Meistaradeildarinnar. Breiðablik er í mjög góðu færi.