Lestu um leikinn: FH 2 -  1 KA

„Þetta var leikur sem bauð uppá allt, hann bauð uppá flotta kafla, lélega kafla, alvöru baráttu. Mikið um einvígi og spjöld. Bæði lið gáfu allt í þetta. Og dramatíkin.. svei mér þá. Ef Lenny gerir mér þetta aftur þarf ég að taka hann í gegn," sagði Eiður Smári Guðjohnsen, þjálfari FH, brosandi eftir leikinn, og vitnar þar í vítaspyrnuna sem Steven Lennon klúðraði.

„KA er með leikmenn sem geta brotið leikinn upp úr engu og voru oft á tíðum nálægt því en við héldum haus. Davíð (Snær Jóhannsson) kemur inn í lokin og tryggir okkur þetta með yndislegu marki."

Eiður var líka ánægður með að sleppa við framlengingu en FH á fallbaráttuleiki gegn Leikni og ÍA framundan.

„Við fögnum þessum sigri í einn til tvo klukkutíma í kvöld og svo er það deildarkeppnin sem tekur aftur við. Þar bíða okkur líka úrslitaleikir. Við vitum að við erum að fara að mæta liðum sem eru í beinni samkeppni við okkur. Við þurfum að sjá til þess að við náum að halda þessari stemningu sem hefur verið hérna undanfarnar vikur."

„Það hefur eitthvað breyst hérna í Krikanum. Það er andi og allt fólkið er með okkur. Fólkið finnur fyrir því. Það er eitthvað skemmtilegt í loftinu hérna og að fara í úrslitaleikinn og gefa fólkinu þessa eftirvæntingu og stemningu í kringum leikinn. Það er yndisleg upplifun og vonandi verður hún enn betri á deginum sjálfum."

FH mun leika gegn Víkingi í úrslitaleiknum þann 1. október.