Amanda Jacobsen Andradóttir kom inn á 62. mínútu, í stöðunni 1-1, er Nordsjælland mætti KoldingQ í efstu deild kvenna í Danmörku.

Nordsjælland gerði eina markið í fyrri hálfleik en gestirnir jöfnuðu snemma í síðari hálfleik og hélst staðan jöfn 1-1 þar til KoldingQ tók forystuna á 76. mínútu.

Nordsjælland brást við með að blása til sóknar en var refsað grimmilega, með þremur mörkum á fjögurra mínútna kafla á lokasprettinum.

Lokatölur urðu því 1-5 fyrir KoldingQ en liðin eru á svipuðu róli um miðja deild þar sem aðeins eitt stig skilur liðin að.

Amanda kom knettinum í netið í leiknum en markið var ekki dæmt gilt því aðstoðardómarinn flaggaði rangstöðu. Endursýning sýnir að sá dómur var kolrangur.