Albert Guðmundsson hefur verið í fantaformi í vikunni og skoraði hann tvennu í 3-0 sigri AZ Alkmaar gegn Waalwijk í kvöld. Albert er þar með búinn að skora fimm mörk í þremur leikjum síðustu átta daga.

AZ lenti aldrei í erfiðleikum með Waalwijk í dag og kom fyrsta mark leiksins á fimmtu mínútu. Teun Koopmeiners fékk tækifæri til að tvöfalda forystuna í síðari hálfleik en hann brenndi af vítapunktinum eftir að Albert hafði fiskað vítaspyrnu.

Skömmu síðar skoraði Albert af stuttu færi og gerði hann svo út um leikinn í uppbótartíma. Bæði mörk Alberts voru alvöru framherjamörk af stuttu færi.

Þetta er fyrsti sigur AZ Alkmaar á nýju deildartímabili. Liðið gerði jafntefli fyrstu fimm umferðirnar þrátt fyrir að hafa sýnt mikla yfirburði í flestum leikjum.