Það er staðreynd að flest mörk eru skoruð í ítalska boltanum og hafa verið undanfarin ár. Tímabilið í ár virðist ætla að bæta öll met enda hætta mörkin einfaldlega ekki að koma.

Í dag er því hægt að búast við miklu fjöri en dagurinn byrjar á heimaleik Udinese gegn Zlatan Ibrahimovic og félögum í AC Milan. Ítalíumeistarar Juventus, sem hafa farið hikstandi af stað undir stjórn Andrea Pirlo, heimsækja svo nýliða Spezia.

Sá leikur fer fram á sama tíma og viðureign Torino og Lazio sem er afar áhugaverð. Vængbrotið og þreytt lið Lazio gæti lent í miklum erfiðleikum gegn nokkuð öflugum andstæðingum.

Tveir mest spennandi leikir helgarinnar hefjast klukkan 17:00. Roma mætir þar Fiorentina í höfuðborginni á meðan Napoli fær Sassuolo í heimsókn. Í Napolí er hægt að búast við sérstaklega miklu fjöri þar sem tvö léttleikandi sóknarlið mætast.

Lokaleikurinn fer fram í kvöld og er hann einnig afar áhugaverður. Þar mætast Sampdoria og Genoa í blóðugum og frægum grannaslag. Þessir slagir eru þó frægari fyrir gríðarlega baráttu frekar en eitthvað sem tengist gæðum eða markaregni. Sampdoria lítur þó afar vel út undir stjórn Claudio Ranieri í ár.

Leikir dagsins:
11:30 Udinese - Milan (Stöð 2 Sport 2)
14:00 Spezia - Juventus (Stöð 2 Sport 2)
14:00 Torino - Lazio
17:00 Roma - Fiorentina
17:00 Napoli - Sassuolo
19:45 Sampdoria - Genoa (Stöð 2 Sport 4)