Pogba mætti aftur eftir ökklameiðsli í tvo leiki gegn Newcastle og Watford en hann byrjaði báða leikina á bekknum. Hann var svo óvænt ekki í leikmannahópnum gegn Burnley og staðfesti Ole Gunnar Solskjær, stjóri liðsins, í gær að hann yrði frá næstu vikurnar.

Það virðist þó eitthvað undarlegt við þessa fjarveru hans en Solskjær minntist á það í viðtali í gær að föruneyti og ráðgjafar Pogba hafi ráðlagt honum að fara í aðgerð á ökkla.

Pogba hefur sjálfur ekki talað um framtíð sína en Mino Raiola, umboðsmaður leikmannsins, sagði sjálfur í viðtali að hann og Pogba væru sáttir við að hann yrði áfram hjá United.

Talið er að Pogba sé að reyna að komast frá United og til Real Madrid.

„Hann verður frá í þrjár eða fjórar vikur kannski, ég veit það ekki alveg. Hans fólk hefur ráðlagt honum að fara í aðgerð og hann mun örugglega gera það," sagði Solskjær.

„Hann er búinn að fara í myndatöku og þetta er ekkert alvarlegt en eitthvað sem þarf að skoða og ganga frá sem fyrst," sagði hann í lokin.