Brighton tók á móti Wolves í næstsíðasta leik dagsins í ensku úrvalsdeildinni og úr varð mikil skemmtun.

Úlfarnir byrjuðu vel en Aaron Connolly kom heimamönnum yfir gegn gangi leiksins. Hann var þá á undan Rui Patricio í fyrirgjöf frá kantinum.

Úlfarnir voru þó ekki lengi að jafna því Roman Saiss skoraði með skalla eftir fyrirgjöf og hægt er að kenna Lewis Dunk um að hafa ekki skallað boltann í burtu.

Svo var komið að kafla Dan Burn, sem skoraði klaufalegt sjálfsmark og fékk dæmda á sig klaufalega vítaspyrnu á tíu mínútna kafla fyrir leikhlé. Úlfarnir leiddu því 1-3 í leikhlé en Neal Maupay skoraði strax á fyrstu mínútu eftir leikhlé. Hann skoraði þá úr vítaspyrnu eftir að Joao Moutinho reyndist brotlegur innan teigs.

Úlfarnir áttu betri fyrri hálfleik en heimamenn í Brighton stjórnuðu gangi mála í síðari hálfleik. Þeir verðskulduðu jöfnunarmarkið sem Lewis Dunk skoraði á 70. mínútu til að bæta upp fyrir mistök sín frá því fyrr í leiknum.

Skömmu síðar kom Brighton knettinum aftur í netið en markið ekki gilt þar sem dómarinn hafði dæmt brot áður en skotinu var hleypt af. Endursýningar sýndu að líklega var ekki um brot að ræða en VAR mátti ekki skera sig í leikinn.

Leikurinn róaðist niður undir lokin en það voru Úlfarnir sem komust næst því að skora í uppbótartímanum. Adama Traore gerði þá frábærlega að koma fyrirgjöf á kollinn á Owen Otasowie sem skallaði yfir úr góðu færi.

Lokatölur 3-3 og eru Úlfarnir með 22 stig eftir 17 umferðir. Brighton er með 14 stig.