Hræðilegt gengi Sheffield United heldur áfram. Liðið lá 2-0 gegn Crystal Palace á Selhurst Park í dag og hefur enn ekki unnið leik síðan fótboltinn fór aftur af stað í júní erftir Covid-hlé.

Sheffield er með tvö stig á botni ensku úrvalsdeildarinnar sem er versti árangur liðs þegar komið er þetta langt inn í tímabilið.

Það voru þeir Jeffrey Schlupp og Eberechi Eze sem skoruðu mörkin. Fyrra markið kom eftir undirbúning Christian Benteke strax á 4. mínútu.

Mark Eze var einstaklega laglegt en varnarleikur Sheffield United var upp á ansi fáa fiska. Eze hafði byrjað á bekknum en kom inn á fyrir Schlupp sem meiddist í fyrri hálfleiknum.

Palace fer upp í 12. sætið með sigrinum en Sheffield er ellefu stigum frá öruggu sæti með einungis átta mörk skoruð eftir sautján leiki.