Pochettino gerði garðinn frægan við stjórnvölinn hjá Tottenham. Hann bætti liðið til muna á dvöl sinni þar og komst félagið í úrslitaleik Meistaradeildarinnar í fyrsta sinn í sögu sinni en tapaði þar gegn Liverpool.

Pochettino hefur áður sagt að það væri draumur að taka við PSG eftir að hafa spilað fyrir félagið frá 2001 til 2003.

„Þetta er ótrúlega efnilegt knattspyrnulið," voru fyrstu orð Pochettino eftir að hann var kynntur sem nýr þjálfari. Hann skrifaði undir eins og hálfs árs samning, sem gildir til júní 2022.

„Þetta er mikill heiður fyrir mig. Þetta félag hefur alltaf átt stað í hjarta mínu. Ég á stórkostlegar minningar frá dvöl minni í París, þá sérstaklega frá stemningunni sem myndaðist á Parc des Princes.

„Ég kem hingað auðmjúkur og með mikinn metnað. Ég hlakka til að vinna með nokkrum af hæfileikaríkustu knattspyrnumönnum heims. Þetta lið getur gert stóra hluti og ég mun gera allt í mínu valdi til að ná sem bestum árangri með PSG.

„Leikstíll okkar mun einkennast af mikilli baráttu og sóknarbolta, alveg eins og stuðningsmenn í París elska að sjá."