Conte stýrði Chelsea til sigurs í ensku úrvalsdeildinni á sínu fyrsta tímabili á Englandi, annað árið hans var hins vegar ekki jafn gott og Chelsea endaði tímabilið í 5. sæti ásamt því að vinna enska bikarinn.

Conte var rekinn frá Chelsea eftir tímabilið 2017/18 en hann minnir þó á að honum tókst að gera eitthvað sem stjórum eins og Jurgen Klopp og Pep Guardiola tókst ekki að gera, að vinna deildina á sínu fyrsta tímabili.

„Hjá Chelsea vann ég deildina á mínu fyrsta tímabili hjá félaginu og svo vann ég enska bikarinn á öðru ári mínu," sagði Conte.

„Klopp hefur ekki unnið neitt enn á Englandi eftir fjögur ár og Guardiola vann ekki neitt á sínu fyrsta tímabili," sagði Conte að lokum.

Það er mikilvægur leikur í toppbaráttunni hjá Conte og lærisveinum hans í Inter í kvöld þegar þeir mæta Udinese, með sigri minnka þeir forskot Juventus á toppnum í þrjú stig.