Guðmundur var í landsliðshópnum í verkefninu í sumar og átti góðan leik gegn Póllandi. Arnar Þór Viðarsson, þjálfari landsliðsins, var til viðtals í síðustu viku og var hann spurður út í Guðmund. Var það frammistaðan í verkefninu í sumar sem er að tryggja honum sætið núna?

„Hann spilaði að mínu mati mjög vel í leiknum á móti Póllandi en það er alls ekki bara Póllandsleikurinn. Það hefur alltaf eitthvað að segja þegar maður vinnur með leikmönnum og kynnist þeim, það er oft erfitt að mynda sér skoðun bara á því að horfa á leiki. Við þjálfarar höfum verið í því síðustu tvö ár að horfa bara á leiki á Wyscout í tölvunni."

„Út frá hans frammistöðu í Bandaríkjunum og í ferðinni allri í maí/júní og núna undanfarna mánuði, þó hann hafi að undanförnu ekki alltaf verið í liðinu, þá hefur hann stimplað sig inn og á að mínu mati skilið að vera í þessum hóp," sagði Arnar. Viðtalið við Arnar má nálgast hér að neðan.

Valið var einnig rætt í útvarpsþættinum Fótbolti.net síðasta laugardag. „Brynjar Ingi og Gummi Tóta eru verðlaunaðir fyrir flotta frammistöðu í síðasta glugga, þeir eru áfram í hópnum og skemmtilegur Instagram-póstur frá Gumma Tóta. Hann er búinn að reyna koma sér inn í svona alvöru hóp fyrir keppnisleiki í svakalega langan tíma," sagði Elvar Geir Magnússon.

„Með mjög gott klapplið á bakvið sig, hefur staðið sig vel og nýtti sénsinn. Það er gaman að sjá svona gæja koma inn," sagði Henry Birgir Gunnarsson.

„Hann er líka graður í að standa sig, hann er ekki að koma inn í eitthvað norm: verðum að gera þetta. Hann vill bara sýna sig og sanna," sagði Benedikt Bóas Hinriksson.

View this post on Instagram

A post shared by Gudmundur Thorarinsson. (@gudmundurthorarins)