Heimild: Vísir 

„Ég er auðvitað bara eins og allir aðrir ofboðslega leiður og sorgmæddur yfir þessu öllu saman. Öll mín samskipti og kynni af þessum strákum hafa verið af góðu einu," sagði Heimir við Vísi.

Mál Kolbeins Sigþórssonar hefur verið mikið í umræðunni og hér er stutt skýring á því máli.

Þórhildur Gyða Arnarsdóttir steig fram í viðtali við RÚV síðasta föstudag og lýsti þar ofbeldi og kynferðislegri áreitni af hálfu Kolbeins. Kolbeinn sendi frá sér yfirlýsingu í gær en aðgerðarhópurinn Öfgar lýsti svo yfir óánægju sinni með yfirlýsinguna.

Kolbeinn var valinn í íslenska landsliðshópinn fyrir komandi leiki en eftir umfjöllun um hans mál þá ákvað stjórn KSÍ að vísa honum úr hópnum. Það hafa önnur meint ofbeldismál landsliðsmanna einnig verið í umræðunni að undanförnu.

Heimir segir að þetta sé fyrst og fremst leiðinlegt og að þetta komi honum jafnmikið á óvart og öllum öðrum.

Heimir er spurður út í þá ákvörðun þegar Kolbeinn var sendur heim eftir tölvupóst frá föður Þórhildar til starfsmanna KSÍ árið 2018. Kolbeinn hafði þá verið valinn í landsliðshópinn fyrir verkefni í Bandaríkjunum sem var síðasta verkefnið í undirbúningi fyrir HM í Rússlandi. Heimir kveðst ekki hafa þurft að taka ákvörðun sem þjálfari hvort Kolbeinn yrði áfram í hópnum.

„Við þurftum þess ekki. Það var bara ákveðið að hann færi heim og myndi afgreiða þetta mál. Þetta var ekki stór ákvörðun fyrir okkur þjálfarana því hann gat hvort sem er ekki verið með á æfingum hjá okkur.“

Heimir segir þá að honum hafi verið heimilt að velja Kolbein í HM-hópinn. Kolbeinn var ekki í leikmannahópi Íslands í Rússlandi.

„Já, okkur var tjáð að þessi mál væru afgreidd. Hann kom því til greina eins og allir aðrir,“ sagði Heimir. Ákvað hann að sleppa því að velja Kolbein á HM vegna þessa máls?

„Það hafði örugglega áhrif, meðvitað eða ómeðvitað, á að við völdum hann ekki. Ég get ekki sagt til um hversu mikil.“

Viðtalið í heild má sjá með því að smella hér.