Leikur Íslands og Hvíta Rússlands í undankeppni HM 2023 fer fram á Laugardalsvelli klukkan 17:30 í dag. Miðasalan hefur farið frekar hægt af stað og Sara Björk Gunnarsdóttir landsliðsfyrirliði vill sjá fólk mæta á völlinn.
Laugardalsvöllur tekur 9800 áhorfendur í sæti en í gær var aðeins búið að selja 3300 miða sem er svipaður fjöldi og íslenskir áhorfendur á hverjum leik á EM í Englandi í sumar.
„Fólk þarf að mæta á völlinn. Það var mikið hype í kringum EM og margt fólk sem flaug út og horfði á leikina," sagði Sara Björk en margir kvörtuðu yfir hversu fljótt var uppselt á leikina í Manchester í sumar og einnig yfir því að Ísland spilaði ekki æfingaleik hér heima fyrir EM í sumar.
„Núna er tækifæri, við erum að spila heima en gátum ekki spilað heima fyrir EM. Fólk þarf að fara upp úr sófanum og mæta. Félögin verða líka að ýta undir að stelpurnar mæti á leiki og sem flestir," sagði Sara Björk.