Einn leikur var á dagskrá í þýsku úrvalsdeildinni í kvöld.

Union Berlin heimsótti þá Hoffenheim en bæði lið voru um miðja deild fyrir leikinn.

Markalaust var í hálfleik en það dró heldur betur til tíðinda í þeim síðari. Á 58. mínútu fengu gestirnir vítaspyrnu og fékk Roberto Skov rautt spjald í liði heimamanna.

Max Kruse steig á punktinn og skoraði. Tíu mínútum fyrir leikslok jafnaði Munas Dabbur metin fyrir Hoffenheim en það var Joel Pohjanpalo sem kom gestunum yfir fimm mínútum fyrir leikslok.

Cedric Teuchert rak þá síðasta naglann í kistu Hoffenheim í uppbótartíma. Góður sigur hjá Union Berlin staðreynd og er liðið í 8. sæti deildarinnar. Hoffenheim er í því tólfta.