Marcus Thuram er enn meiddur og því er búist við að Ange-Yoan Bonny leiði sóknarlínuna ásamt fyrirliðanum Lautaro Martínez. Þá er einnig búist við að Petar Sucic haldi sínu sæti á miðjunni eftir meiðsli Henrikh Mkhitaryan.

Inter er í þriðja sæti Serie A sem stendur og getur minnkað bilið á milli sín og toppliðs Napoli niður í eitt stig með sigri. Verona er aftur á móti aðeins með fimm stig og enn án sigurs, þrátt fyrir að hafa sýnt mjög góða kafla á upphafi tímabils.

Fiorentina og Lecce eigast svo við í Íslendingaslag, þar sem Albert Guðmundsson og Þórir Jóhann Helgason eru í leikmannahópunum. Óljóst er hvort þeir verði í byrjunarliðunum.

Það eru aðeins tvö stig á milli liðanna í fallbaráttunni, þar sem Fiorentina er óvænt aðeins með fjögur stig eftir níu umferðir. Lecce er með sex stig.

Torino mætir nýliðum Pisa áður en Parma spilar við Bologna og svo er stórleikur helgarinnar á dagskrá um kvöldið.

Þar eigast AC Milan og AS Roma við í toppbaráttunni þar sem þrjú stig skilja á milli þeirra.

Milan er að glíma við meiðslavandræði og því má búast við að Christopher Nkunku byrji í fremstu víglínu ásamt Rafael Leao, sem er þó tæpur. Christian Pulisic og Santi Giménez eru ekki með vegna meiðsla.

Roma getur endurheimt toppsæti deildarinnar með sigri á meðan Milan þarf sigur til þess að jafna Rómverja á stigum í öðru sæti.

Serie A
11:30 Verona - Inter
14:00 Fiorentina - Lecce
14:00 Torino - Pisa
17:00 Parma - Bologna
19:45 Milan - Roma