Newcastle og Leicester áttust við í fyrri leik dagsins í ensku úrvalsdeildinni og var staðan markalaus eftir arfaslakan fyrri hálfleik.

James Maddison skoraði snemma í síðari hálfleik eftir góðan undirbúning frá Jamie Vardy og tvöfaldaði Youri Tielemans forystuna með frábæru skoti eftir laglega fyrirgjöf frá Marc Albrighton.

Það lifnaði við leiknum eftir annað markið og átti Vardy skot í slá skömmu síðar. Heimamenn vöknuðu til lífsins og skiptu Andy Carroll inná. Það tók hann aðeins nokkrar mínútur að hafa áhrif á leikinn þegar hann skoraði með flottu skoti eftir að Leicester tókst ekki að hreinsa boltann frá marki í kjölfar aukaspyrnu.

Það var mikið fjör lokamínúturnar þar sem bæði lið gerðu sig hættuleg en inn vildi boltinn ekki. Niðurstaðan því 1-2 sigur Leicester eftir fjörugan seinni hálfleik.

Leicester fer upp í þriðja sæti með sigrinum og er þar einu stigi eftir toppliðunum sem eiga þó bæði leik til góða. Newcastle er áfram í neðri hlutanum, með 19 stig eftir 16 umferðir.