Origi samdi við Liverpool árið 2014 eftir að hafa spilað frábærlega fyrir Lille í frönsku deildinni. Í samkomulagi var að Origi yrði lánaður aftur til Lille og gekk hann því ekki formlega til liðs við Liverpool fyrr en sumarið 2015.

Hann lofaði góðu fyrstu árin en þrálát meiðsli settu strik í reikninginn. Það var svo á síðustu leiktíð þar sem hann blómstraði og átti stóran þátt í að skila Liverpool sjötta Meistaradeildartitlinum.

„Ég er betri leikmaður en ég var á síðasta ári. Klopp hefur gefið mér svigrúm til að þróa leik minn. Ég hef alltaf farið eftir mínu innsæi og lagt hart að mér. Ég hef rætt við Liverpool og eigum góða leið framundan. Ég vil bara bæta mig hér," sagði Origi við Het Laatste Niuews í Belgíu.

„Þetta er verkefnið mitt og ég vil fylgja því. Ég veit ekki hversu lengi ég mun gera það en mér finnst ég vera að bæta mig og því var það leiðinlegt að tímabilið var stöðvað vegna kórónaveirunnar," sagði Origi ennfremur.