Jordan Pickford.
„Ég vann mína rannsóknarvinnu. Ég er með kraft og lipurð. Ég er ekki stærsti markvörður í heimi og mér er sama. Þetta snýst um að vera mættur á réttu augnabliki og verja, og ég gerði það," sagði Jordan Pickford, hetja Englands, eftir sigur á Kólumbí í vítaspyrnukeppni í 16-liða úrslitum á HM.
Sjá einnig:
HM: England stóðst hindrunina og mætir Svíþjóð næst
Pickford varði frábærlega undir lok venjulegs leiktíma en reyndar kom jöfnunarmark Kólumbíu úr hornspyrnu eftir þá vörslu. Í vítaspyrnukeppninni varði Pickford vítaspyrnu Carlos Bacca og varð þar með fyrsti enski markvörðurinn til að verja í vítaspyrnukeppni á stórmóti í 20 ár.
Talað var um það að Gareth Southgate, landsliðsþjálfari Englands, myndi skipta Nick Pope inn á fyrir Pickford ef vítaspyrnukeppni yrði niðurstaðan. Pickford fékk hins vegar traustið og þakkaði fyrir það.
„Ég var stressaður"
Eric Dier, miðjumaður Tottenham, skoraði úr síðustu vítaspyrnu Englands.
„Ég var stressaður, ég neita því ekki. Ég hef aldrei verið í svona stöðu áður en ég varð að skora. Ég er þakklátur að ég skyldi gera það," sagði Dier eftir leikinn.
„Jordan (Pickford) er frábær markvörður og á allt gott skilið. Viðhorf hans er magnað. Hann hefur verið frábær á æfingum og tekið það með sér inn í leikina."
Athugasemdir
