„Þetta spilaðist eins og við vildum og mér fannst við vera ofan á svona heilt yfir í baráttu og gæðum í þeim atriðum sem við vildum kalla fram í leiknum," sagði Jakob þjálfari Hauka eftir tap á móti Þór/KA í 8-liða úrslitum Mjólkurbikarsins í dag.
Lestu um leikinn: Þór/KA 3 - 1 Haukar
„Leikurinn þróaðist nákvæmlega eins og við vildum. Ég er gríðalega stoltur af mínu liði, þær voru frábærar í dag."
Haukastelpur voru flottar og gáfu Þór/KA sem er deild ofar ekki tommu eftir.
„Við erum á góðu róli í deildinni og erum að vinna í ákveðnum þáttum. Við þurftum að nálgast þennan leik á annan hátt. Við vorum að mæta liði sem er í deild fyrir ofan og mér fannst við sýna það í þessum leik að við værum síst slakari aðilinn."
Liðið komst yfir í seinni hálfleik en fékk svo á sig þrjú mörk.
„Það var virkilega svekkjand. Mér fannst eiginlega ósanngjarnt að við værum ekki eitt eða tvö núll yfir í hálfleik. Við áttum að fá augljósa vítaspyrnu og fengum sénsa þar sem þær klúðra sendingu í öftustu línu og það vantaði lítið upp á að við kæmust inní það. Við vissum að við myndum fá sénsa í seinni hálfleik og ætluðum að láta það telja og halda hreinu. Hins vegar kemur móment þar sem við sofnum á verðinum. Arna Sif er stórhættuleg í föstum leikatriðum."
Liðið er í þriðja sæti í Lengjudeildinni með 20 stig og ekki búið að tapa í síðustu fjórum leikjum.
„Við stefnum upp og við sýndum það í dag. Við vorum jafn góðar og þær í dag. Það segir okkur bara eitt að við getum verið í efstu deild."
Haukar eiga Víking R. í næsta leik en þær eru búnar að mæta þeim tvisvar í sumar. Einu sinni í bikar þar sem þær unnu og einu sinni í deild þar sem þær töpuðu.
„Við erum búnar að læra af þessum tveimur leikjum töluvert. Við erum með ákveðna taktík sem við ætlum að beita í þeim leik."
Viðtalið má sjá í heild sinni hér að ofan.
Athugasemdir
