Jörundur Áki Sveinsson, landsliðsþjálfari U19 kvenna, hefur valið hóp sem leikur í undankeppni EM 2022. Jörundur er að fara í sitt fyrsta verkefni með liðið en hann tók við liðinu af Þórði Þórðarsyni sem hætti með liðið í júní.

Ísland er í riðli með Frakklandi, Svíþjóð og Serbíu, en leikið verður í Serbíu dagana 15.-21. september.

Tvö félög eru með þrjá leikmenn í hópnum. Það eru Augnablik og Þróttur Reykjavík. Vekur athygli að í hópnum eru þrjár stelpur sem eiga enga landsleiki. Það eru þær Freyja Karín, Dagný Rún og Þóra Björg.

Freyja hefur raðað inn mörkum í 2. deild, Dagný hefur átt gott tímabil í Fossvoginum og svo hefur Þóra verið að spila talsvert með ÍBV í Pepsi Max-deildinni.

Þær Bergþóra Sól Ásmundsdóttir, Jakobína Hjörvarsdóttir og Bryndís Arna Níelsdóttir eru meiddar og komu ekki til greina í þennan hóp.