Mynd: Getty Images

Mynd: EPA

Real Sociedad og Atletico Madrid áttust við í stórleik í spænska boltanum í dag og tóku gestirnir frá Madríd forystuna snemma leiks.

Alvaro Morata fylgdi þá skoti eftir með marki í kjölfar hornspyrnu á fimmtu mínútu og átti viðureignin eftir að reynast hin mesta skemmtun.

Heimamenn komust nálægt því að jafna áður en Morata setti boltann aftur í netið en markið ekki dæmt gilt vegna hendi. Leikmenn Atletico voru í miðjum fagnaðarlátum þegar þeim var greint frá því að verið væri að skoða markið.

Bæði lið fengu færi til að skora áður en Umar Sadiq, sem er nýkominn til Sociedad eftir að hafa verið keyptur frá Almeria, skallaði boltann í netið til að gera jöfnunarmark snemma í síðari hálfleik.

Sociedad kom boltanum aftur í netið en dæmd rangstaða og komust gestirnir nær því að stela sigrinum en inn vildi boltinn ekki. Alex Remiro átti mjög góðan seinni hálfleik á milli stanga heimamanna og varði meðal annars mjög gott skot frá Joao Felix á 99. mínútu, undir lok uppbótartímans.

Bæði lið eru núna með sjö stig eftir fjórar umferðir.