Nýliðar Leeds United tóku á móti stórliði Manchester City í enska boltanum í dag og úr varð hörkuleikur.

Man City átti góðan fyrri hálfleik og skoraði Raheem Sterling snemma leiks. Leikurinn var mjög líflegur og fengu bæði lið góð færi en Man City verðskuldaði að fara inn í leikhlé með forystu.

Í síðari hálfleik skiptu heimamenn í Leeds um gír og yfirspiluðu gestina á köflum.

Rodrigo Moreno skoraði verðskuldað jöfnunarmark í kjölfar hornspyrnu snemma í síðari hálfleik. Ederson gerði slæm mistök á milli stanganna þar sem hann missti boltann beint fyrir fætur Rodrigo.

Bæði lið fengu færi til að stela sigrinum en það voru heimamenn sem fengu betri færi og voru óheppnir að koma knettinum ekki í netið. Ederson bætti upp fyrir slæmu mistökin fyrr í leiknum með frábærum markvörslum og urðu lokatölurnar 1-1 eftir skemmtilega og fjöruga viðureign.