Ítalski framherjinn Graziano Pelle er með tilboð í höndunum frá bæði Inter og Juventus en hann er án félags eftir að hafa yfirgefið kínverska félagið Shandong Luneng á dögunum.
Pelle er 35 ára gamall og hefur spilað í Kína síðustu fjögur árin þar sem hann gerði 62 mörk í 133 leikjum.
Þar áður lék hann afar vel með Southampton í ensku úrvalsdeildinni og var þeirra besti maður með 30 mörk í 81 leik á tveimur tímabilum.
Hann fann sig aldrei á Ítalíu í upphafi ferils eftir að hafa spilað með Cesena, Parma og Sampdoria og var það ekki fyrr en hann gekk til liðs við Feyenoord í Hollandi þar sem hæfileikar hans fengu að blómstra.
Þessi mikli fengur er nú samningslaus og með tilboð í höndunum frá bæði Inter og Juventus í Seríu A auk þess sem lið frá sameinuðu furstaríkjunum hafa áhuga á honum.
Pelle mun ákveða sig á næstu vikum en það verður gaman að sjá hvort hann hefur gæðin til að spila með þeim bestu.
Athugasemdir