Evra spilaði með Man Utd frá 2006 til 2014 en hann ræddi atvik er liðið var erlendis í æfingaferð á undirbúningstímabilinu.

Leikmenn liðsins voru afar þreyttir og fóru beint upp í rútu á meðan Ferguson var úti að árita fyrir stuðningsmenn sem höfðu beðið eftir leikmönnunum.

„Áður en við fórum í rútuna vorum við ógeðslega þreyttir og það var röð af stuðningsmönnum. Leikmennirnir tóku ákvörðun um að enginn myndi árita og við fórum allir inn í rútu. Ég horfði svo út um gluggann og sé Ferguson árita fyrir alla," sagði Evra í hlaðvarpsþætti Man Utd.

„Ég get svarið það að hann var að árita í 45 mínútur. Hann áritaði fyrir alla. Ég sagði svið strákana að við værum dauðir þegar hann myndi koma aftur inn í rútuna."

„Hann kom inn í rútu og hraunaði yfir okkur! sagði Evra og vitnaði þá í það sem Ferguson hrópaði yfir alla í rútunni.

„Hverjir í andskotanum haldið þið að þið séuð? Þetta er fólkið sem borgar launin ykkar. Þetta er fólkið sem kemur og horfir á ykkur spila. Drullið ykkur út úr rútunni og áritið fyrir fólkið," sagði Ferguson við leikmennina.

„Við þurftum að árita fyrir alla. Þetta var hugarfarið hjá Manchester United," sagði Evra ennfremur.