Kamerúnski varnarmaðurinn George Elokobi hefur ákveðið að leggja skóna á hilluna eftir nokkuð farsælan feril. Hann er hvað þekktastur fyrir frammistöðu sína með Wolves fyrir rúmum áratug síðan.
Elokobi, sem er 36 ára gamall, er fæddur og uppalinn í Kamerún en fluttist til Englands þegar hann var 16 ára.
Hann spilaði í neðri deildunum á Englandi áður en Mick McCarthy ákvað að fá hann til Wolves árið 2008.
Varnarmaðurinn öflugi var allan ferilinn í rosalegu formi og eyddi löngum stundum að lyfta lóðum en hlutverk hans hjá Wolves gríðarlega mikilvægt í þrjú ár.
Elokobi hjálpaði Wolves að komast upp í ensku úrvalsdeildina á fyrsta tímabili og festi sig í sessi í byrjunarliði liðsins í efstu deild.
Tímabilið 2010-2011 varð hann að hálfgerðri költ-hetju en hann átti stóran þátt í að liðið hélt sér uppi. Hann skoraði meðal annars sigurmark gegn Manchester United í deildinni og kom í veg fyrir að liðið, undir stjórn Sir Alex Ferguson, færi taplaust í gegnum tímabilið.
Ferillinn fór niður á við tímabilið á eftir og sat hann mikið á bekknum áður en hann fór til Nottingham Forest. Hann spilaði í neðri deildunum á Englandi næstu árin en síðast lék hann fyrir Maidstone United.
Elokobi hefur nú ákveðið að kalla þetta gott og leggja skóna á hilluna. Elokobi þjálfar nú akademíuna hjá Maidstone og því ljóst hvað tekur við hjá honum.
After 19 years in this Beautiful Sport. The time has come for me to hang up my playing boots #Chop🔥 pic.twitter.com/FGrSXCV0jz
— George Elokobi (@georgeelokobi) May 3, 2022
Athugasemdir