Mohamed Salah, leikmaður Liverpool, var ekki lengi að tjá sig eftir að Real Madrid tryggði sig í úrslitaleik Meistaradeildarinnar en hann getur ekki beðið eftir að mæta spænska liðinu.
Það muna eflaust flestir eftir því er Sergio Ramos notaði fantabrögð sín og meiddi Salah í úrslitaleik þessara liða í Meistaradeildinni árið 2018.
Salah fór af velli og Real Madrid vann leikinn 3-1. Madrídingar tryggðu sig í úrslitaleikinn í kvöld með sigri á Manchester City og er Salah spenntur að mæta spænska liðinu.
Hann sagði frá því í gær að hann vildi fá Madrid í úrslitum og talaði um að það væri erfitt að mæta City og fékk hann ósk sína uppfyllta.
Egypski sóknarmaðurinn birti myndir úr sigri Liverpool í gær og skrifaði undir: „Eigum harma að hefna."
Úrslitaleikurinn fer fram á Stade De France í París þann 28. maí.
Athugasemdir