Emmanuel Macron, forseti Frakklands, segist hafa ráðlagt Kylian Mbappe að vera áfram hjá Paris Saint-Germain, en hann sagði frá þessu í dag.
Mbappe tók sér dágóðan tíma í að ákveða framtíð sína en valið stóð á milli PSG og Real Madrid.
Um tíma virtist hann vera á leið til spænska félagsins en honum snérist hugur á elleftu stundu og framlengdi við PSG til næstu þriggja ára.
Franskir fjölmiðlar höfðu greint frá því að Emmanuel Macron reyndi að hafa áhrif ákvörðun Mbappe og staðfesti forsetinn það í dag.
„Það er rétt að ég hafði samband við Mbappe áður en hann tók ákvörðun um framtíð sína."
„Á formlegan hátt ráðlagði ég honum að vera áfram í Frakklandi. Ég tel það mína ábyrgð, sem forseti Frakklands, að vernda landið," sagði Macron sem lagði ríginn til hliðar, svona í ljósi þess að hann er harður stuðningsmaður erkifjendanna í Marseille.
Athugasemdir