Senegalski sóknarmaðurinn Sadio Mané er markahæsti leikmaðurinn í sögu senegalska landsliðsins en hann gerði þrennu í 3-1 sigri á Benín í undankeppni Afríkukeppninnar í kvöld.
Mané var heldur betur í gírnum í kvöld og skoraði fyrsta markið eftir tólf mínútur úr vítaspyrnu áður en hann bætti við öðru marki tíu mínútum síðar og jafnaði þar með markamet Henri Camara.
Hann fullkomnaði svo þrennu sína með öðru marki úr vítaspyrnu eftir klukkutímaleik og endaði kvöldið sem markahæsti leikmaður landsliðsins frá upphafi.
Mané, sem er á mála hjá Liverpool, mun að öllum líkindum yfirgefa félagið í sumar og ganga í raðir Bayern München en gaf vísbendingar um það á blaðamannafundi fyrir leikinn gegn Benín.
Sóknarmaðurinn hefur unnið allt sem hægt er að vinna með Liverpool og vill fá nýja áskorun en hefur þó ekki tjáð Liverpool beint að hann vilji fara frá félaginu.
Athugasemdir