Armenski sóknartengiliðurinn Henrikh Mkhitaryan hefur hafnað nýju samningstilboði frá Roma og mun þess í stað spila fyrir Inter á næstu leiktíð.
Mkhitaryan var fastamaður í byrjunarliði Roma en hann vill spreyta sig í Meistaradeildinni áður en hann leggur skóna á hilluna og velur því að skipta til Inter.
Mkhitaryan, 33 ára, fær tveggja ára samning hjá Inter sem er með það sem markmið að vinna ítölsku deildina eftir að hafa misst titilinn til nágranna sinna og erkifjenda í AC Milan í vor.
Mkhitaryan skoraði 29 mörk í 117 leikjum á tveimur og hálfu ári hjá Roma.
Greint er frá því að Mkhitaryan sé búinn að samþykkja samningstilboð frá Inter og standast læknisskoðun. Félagið á aðeins eftir að tilkynna skiptin.
Athugasemdir
