Heimild: FSF
Gunnar Nielsen, markvörður FH og landsliðsmarkvörður Færeyja, hefur verið kallaður aftur til Hafnarfjarðar og verður því ekki með Færeyjum í næsta leik gegn Andorra í Þjóðadeildinni.
Gunnar varði mark Færeyja í 3-2 sigri gegn Möltu í gærkvöldi og er mikilvægur leikur gegn Andorra á dagskrá á sunnudaginn.
„Það er synd að ég geti ekki verið með gegn Andorra en það er ekkert sem ég get gert í því. Ég er bara ótrúlega ánægður með sigurinn í gær og er viss um að liðið eigi eftir að standa sig vel í Andorra," sagði Gunnar í samtali við færeyska knattspyrnusambandið.
Gunnar, sem verður 34 ára í október, er aðalmarkvörður FH og er búinn að spila tíu leiki í Pepsi Max-deildinni á tímabilinu.
Næsti leikur FH er gegn Stjörnunni í Mjólkurbikarnum á fimmtudag og þar sem Gunnar þarf að fara í fimm daga sóttkví við komuna til Íslands þá mun hann ekki spila gegn Andorra.
Athugasemdir