Enska kvennalandsliðið er búið að tryggja sér sæti á HM kvenna á næsta ári sem verður haldið í Eyjaálfu.
England vann Austurríki á útivelli í gær til að innsigla toppsæti undanriðilsins fyrir lokaumferðina.
Ensku konurnar gjörsamlega rústuðu undanriðlinum sínum, þær eru með fullt hús stiga eftir 9 umferðir og markatöluna 70-0.
England er meðal sterkustu fótboltaþjóða heims og vann EM á heimavelli í sumar.
Ísland á enn góða möguleika á að tryggja sér sæti á HM en þetta verður í fyrsta sinn sem 32 þjóðir taka þátt á lokamóti kvenna.
Alessia Russo og Nikita Parris sáu um markaskorun Englendinga í gær og gaf Lauren Hemp eina stoðsendingu.
Austurríki 0 - 2 England
0-1 Alessia Russo ('7)
0-2 Nikita Parris ('69)
Sterkt landslið Þýskalands tryggði sér þá líka sæti á HM með sigri í gær. Þýsku konurnar fóru nokkuð auðveldlega í gegnum þær tyrknesku og unnu þriggja marka sigur á útivelli.
Þýskaland er með fimm stiga forystu á Portúgal fyrir lokaumferð riðlakeppninnar, með 24 stig eftir 9 umferðir.
Þýska landsliðið mætti því enska í úrslitaleik Evrópumótsins og tapaði í fyrsta sinn í sögu sinni. Þjóðverjar höfðu unnið átta af átta úrslitaleikjum EM kvenna sem þær höfðu tekið þátt í fram að þessu.
Tyrkland 0 - 3 Þýskaland
0-1 Felicitas Rauch ('57)
0-2 Klara Buhl ('59)
0-3 Lea Schuller ('77)
