Arsenal tók á móti Sheffield United í nokkuð bragðdaufum leik. Heimamenn voru betri stærsta hluta leiksins og komust í tveggja marka forystu.

Bukayo Saka skoraði sjaldgæft skallamark á 61. mínútu og tvöfaldaði varamaðurinn Nicolas Pepe forystuna skömmu síðar. Hector Bellerin átti báðar stoðsendingarnar.

Gestirnir blésu til sóknar eftir mark Pepe en náðu ekki að skapa sér mikið. David McGoldrick minnkaði muninn með frábæru skoti á 83. mínútu en nær komust lærisveinar Chris Wilder ekki og lokatölur 2-1.

Arsenal er með níu stig eftir fjórar umferðir á meðan Sheffield er áfram án stiga, með aðeins eitt mark skorað.

Arsenal 2 - 1 Sheffield United
1-0 Bukayo Saka ('61)
2-0 Nicolas Pepe ('64)
2-1 David McGoldrick ('83)

Wolves tók þá á móti nýliðum Fulham. Staðan var markalaus eftir bragðdaufan fyrri hálfleik þar sem Úlfarnir voru þó líklegri.

Pedro Neto skoraði eina mark leiksins snemma í síðari hálfleik og náðu Úlfarnir að halda út gegn bitlausu liði Fulham.

Wolves er með sex stig eftir sigurinn en Fulham er í botnsætinu án stiga.

Wolves 1 - 0 Fulham
1-0 Pedro Neto ('56)