Félagaskiptaglugginn er að líða undir lok og eru margir stuðningsmenn Man Utd ósáttir með hversu illa félaginu gekk á leikmannamarkaðinum.

Woodward hefur yfirumsjón með leikmannakaupum félagsins og hefur verið gagnrýndur harkalega af stuðningsmönnum. Á lokadegi síðasta glugga í janúar söfnuðust rúmlega 20 stuðningsmenn saman fyrir utan hús Woodward og ollu eignarspjöllum með málningarbrúsum, reyksprengjum og blysum.

Það ríkir enn mikil ólga meðal stuðningsmanna Rauðu djöflanna þrátt fyrir frábæran seinni hluta tímabils á síðustu leiktíð sem sá lærisveina Ole Gunnar Solskjær næla sér í Meistaradeildarsæti.

Woodward býr þó ekki í húsi sínu í Cheshire heldur er hann mest með fjölskyldunni í húsi sem þau eiga rétt fyrir utan London.

Félagaskiptaglugginn lokar annað kvöld klukkan 22:00 á íslenskum tíma.