Lautaro Martinez kom Inter yfir í fyrri hálfleik eftir undirbúning frá Ivan Perisic sem prjónaði sig framhjá þremur andstæðingum.

Sergej Milinkovic-Savic jafnaði snemma í síðari hálfleik með skalla eftir fyrirgjöf frá miðverðinum Francesco Acerbi.

Mikill hiti færðist í jafnan leik og fékk Ciro Immobile, markahæsti leikmaður Evrópu á síðustu leiktíð, beint rautt spjald fyrir að setja hendi í andlitið á Arturo Vidal. Immobile var liggjandi í grasinu og ætlaði Vidal að rífa hann á fætur en ítalski framherjinn tók illa í það.

Skömmu fyrir leikslok fékk Stefano Sensi einnig rautt spjald fyrir að setja hendi framan í Patric Gabarron, leikmann Lazio. Snertingin var minniháttar en þetta var viljaverk og reglur eru reglur.

Lokatölur urðu 1-1 og eru bæði lið búin með þrjá leiki. Inter er með sjö stig en Lazio fjögur.

Lazio 1 - 1 Inter
0-1 Lautaro Martinez ('30)
1-1 Sergej Milinkovic-Savic ('55)
Rautt spjald: Ciro Immobile, Lazio ('69)
Rautt spjald: Stefano Sensi, Inter ('86)

Benevento og Parma unnu þá heimaleiki sína gegn Bologna og Verona.

Lærisveinar Filippo Inzaghi hjá Benevento eru óvænt með sex stig eftir þrjár fyrstu umferðirnar. Gianluca Lapadula gerði eina mark leiksins í dag.

Benevento tók á móti Bologna og var aðeins eitt lið á vellinum í fyrri hálfleik en gestunum tókst ekki að skora. Seinni hálfleikurinn var jafn og kom sigurmark heimamanna eftir hornspyrnu. Skömmu síðar virtust gestirnir vera búnir að jafna eftir aðra hornspyrnu en markið ekki dæmt gilt vegna hendi.

Jasmin Kurtic gerði þá eina mark leiksins er Parma lagði Verona í jöfnum leik.

Benevento 1 - 0 Bologna
1-0 Gianluca Lapadula ('66)

Parma 1 - 0 Verona
1-0 Jasmin Kurtic ('1)