Magni og Þór áttust við í hörkuleik með gríðarlega mikla þýðingu fyrir Grenvíkinga sem eru í harðri fallbaráttu. Grenvíkingar komust yfir strax á fyrstu mínútu eftir laglega takta Alejandro Munoz sem lagði upp fyrir Costelus Lautaru.

Sigurður Marinó Kristjánsson jafnaði á 19. mínútu eftir klafs fyrir framan vítateig Magna. Skömmu síðar tóku Akureyringar forystuna þegar Loftur Páll Eiríksson stangaði hornspyrnu í varnarmann og þaðan í netið. Guðni Sigþórsson tvöfaldaði svo forystu Þórs og leiddu gestirnir í leikhlé, 1-3.

Kairo Edwards-John minnkaði muninn í upphafi síðari hálfleiks eftir kómískan varnarleik Akureyringa sem endaði með tveimur mönnum liggjandi í jörðinni. Grenvíkingar sóttu og skoraði Kairo jöfnunarmark á 64. mínútu eftir laglega sendingu frá Alejandro.

Staðan var orðin 3-3 en fjörið var ekki á enda því Jóhann Helgi Hannesson kom Þór aftur yfir á 72. mínútu.

Undir lokin lögðu Magnamenn allt púður í sóknarleikinn og var það næstum búið að skila árangri þegar Kairo steig á vítapunktinn á 93. mínútu. Því miður fyrir Grenvíkinga og Kairo fór boltinn framhjá stönginni og missti hann því af þrennunni sinni og dýrmætu stigi.

Magni er í harðri fallbaráttu við Þrótt R. og Leikni F. þegar tvær umferðir eru eftir af Íslandsmótinu. Liðin þrjú eru jöfn á stigum. Þór siglir lygnan sjó í efri hlutanum.

Það tekur tíma fyrir stöðutöfluna að uppfærast.