Ancelotti tefldi fram sterku byrjunarliði og stjórnuðu hans menn gangi mála í fyrri hálfleik án þess þó að koma knettinum í netið.

Ungt varalið Liverpool tók völdin eftir leikhlé og skoraði Curtis Jones glæsilegt sigurmark á 71. mínútu.

„Ég er aðallega pirraður yfir öllum færunum sem við misnotuðum. Þetta eru mikil vonbrigði en nú þarf öll okkar athygli að snúast að því að gera vel í ensku úrvalsdeildinni," sagði Ancelotti.

„Við áttum að spila betur í dag. Við áttum í of miklum erfiðleikum með að spila boltanum úr vörninni.

„Pressan þeirra gerði gæfumuninn í síðari hálfleik og við verðum að læra af þessu. Við erum dottnir úr bikarnum þannig nú leggjum við allt í deildina og þurfum að einbeita okkur að næsta leik. Við getum farið upp töfluna með sigri og það er markmiðið."

Everton hefur farið vel af stað undir stjórn Ancelotti og er í ellefta sæti sem stendur. Liðið á heimaleik gegn Brighton um næstu helgi og freistar þess að klifra yfir Arsenal á stöðutöflunni.

Liðið hefur fengið sex stig úr þremur leikjum undir stjórn Ancelotti. Síðasti leikur var 2-1 tap gegn Manchester City.