Það voru fimm mörk skoruð á Tottenham Hotspur vellinum þegar heimamenn tóku á móti Southampton í kvöld í endurteknum leik í 4. umferð ensku bikarkeppninnar.

Jack Stephens fékk skot Tanguy Ndombele í sig á 12. mínútu og af Stephens fór boltinn í netið. Shane Long jafnaði metin fyrir Southampton á 34. mínútu.

Á 40. mínútu var James Ward-Prowse, miðjumaður Southampton, borinn af velli eftir að hafa fengið takkana á skóm Ryan Sessegnon í hægra hnéið.

Danny Ings kom gestunum yfir á 72. mínútu eftir laglega sókn en Lucas Moura jafnaði leikinn á 78. mínútu með fínu skoti.

Á 88. mínútu skoraði svo Heung-min Son sigurmark leiksins úr vítaspyrnu og skaut Tottenham áfram. Góð endurkoma sem tryggir liðinu leik gegn Norwich í 5. umferð keppninnar.

Gestirnir mega vera svektir að hafa tapað í kvöld. Þeir áttu sjö skot á mark Tottenham gegn fjórum skotum heimamanna, Southampton lék vel en Tottenham gerði nóg.