Hólmar Örn Eyjólfsson og félagar hans í Levski Sofia eru komnir í undanúrslit búlgarska bikarsins eftir að hafa unnið Ludogorets í vítakeppni í dag.
Hólmar Örn er lykilmaður í vörn Levski en hann lék allan leikinn er liðið komst í undanúrslit bikarsins í dag.
Staðan var 0-0 eftir venjulegan leiktíma og þurfti því að fara með leikinn í framlengingu en ekkert var skorað þar og því vítakeppni sem þurfti að ákveða sigurvegara.
Levski vann 6-5 í vítakeppninni en Hólmar Örn skoraði úr sjötta víti liðsins og hjálpaði liðinu að komast í undanúrslitin.
CSKA Sofia, Lokomotiv Plovdiv og Botev Plovdiv eru öll komin í undanúrslit bikarsins en ekkert lið hefur unnið bikarinn jafn oft og Levski en liðið hefur unnið keppnina 25 sinnum.
Levski er í harðri baráttu í búlgörsku deildinni þá en liðið er í 2. sæti með 45 stig, sjö stigum á eftir Ludogorets.
Athugasemdir