Börsungar eru með tveggja stiga forystu á Real þegar ellefu umferðir eru eftir af tímabilinu. Courtois telur Barca ekki eiga titilinn skilið útaf innbyrðisviðureignum liðanna.

„Við erum bara tveimur stigum á eftir Barcelona. Það væri ósanngjarnt að stöðva tímabilið og krýna Barca sem meistara," sagði Courtois í sjónvarpsviðtali.

„Á þessu ári höfum við verið betri en Barca. Við gerðum jafntefli og unnum þá. Það munar alltof litlu í toppbaráttunni, þetta er ekki eins og á Englandi þar sem Liverpool er svo gott sem búið að vinna titilinn."

Óljóst er hvort spænska deildartímabilið verði klárað en rúmlega 25 þúsund manns hafa látist vegna kórónuveirunnar þar í landi. Búið er að færa bikarúrslitaleik Athletic Bilbao gegn Real Sociedad til næsta árs.