Nú í hádeginu fór fram fréttamannafundur Íslands fyrir leikinn á morgun gegn Albaníu á Laugardalsvelli. Arnar Þór Viðarsson þjálfari og Birkir Bjarnason fyrirliði Íslands sátu fyrir svörum á fundinum.
Arnar Þór Viðarsson segir að staðan á hópnum sé góð og að allir verða klárir í slaginn á morgun fyrir utan Willum Þór Willumsson sem þurfti að yfirgefa hópinn í gær vegna meiðsla.
„Staðan er bara góð. Við þurftum að vísu að kveðja Willum í gær. Hann er búin að vera í smá basli með hásinina og það voru ekki alveg nógu mikil batamerki þar og Willum hafði samband við sinn klúbb í gær og yfirgaf hópinn."
Brynjar Ingi Bjarnason og Hákon Arnar Haraldsson fóru meiddir af velli gegn Ísrael á fimmtudaginn en segir Arnar Þór Viðarsson þá vera klára í slaginn á morgun.
„Þeir sem fengu einhver spörk eða krampa í leiknum úti á móti Ísrael voru að taka síðustu test í dag og það lítur bara vel út og eins og staðan er akkúrat núna eru allir 25 leikmennirnir í hópnum leikfærir á morgun."
