Lionel Messi, einn besti fótboltamaður sögunnar, gerði sér lítið fyrir og skoraði fimm mörk þegar Argentína vann sannfærandi sigur gegn Eistlandi í vináttulandsleik í kvöld.

Leikurinn fór fram á Spáni í kvöld og réðu leikmenn Eista engan veginn við Messi.

Hann skoraði fyrst úr vítaspyrnu á níundu mínútu og bætti svo við öðru marki fyrir leikhlé. Í seinni hálfleiknum gerði hann svo þrjú mörk til viðbótar.

Flottur leikur hjá Argentínu sem ætlar sér alla leið á HM næsta vetur. Verður það mögulega síðasta tækifæri Messi til að vinna heimsmeistaratitilinn með landsliði sínu þar sem hann er orðinn 34 ára gamall.